Naghimo sang maragtas ang Spanish tennis player nga si Carlos Alcaraz bilang pinakabata nga male player nga nakakumpleto sang kampyonato sa Grand Slam matapos nga ginlutos sini si Novak Djokovic sa final sang Australian Open.
Apisar sang mahinay nga mag-umpisa sang hampang para kay Alcaraz, nakabawi ini sa masunod nga mga set kag ginbalabagan ang 38-anyos nga Serbian superstar nga makakuha sang ika-25 na nga Grand Slam title.
2-6, 6-2, 6-3, 7-5 ang score sang duha sa Rod Laver Arena.
Sa edad nga 22-anyos, si Alcaraz ang pinakabata sa Open Era nga nakadaog sa apat ka major tennis tournaments kasunod sang iya nauna nga mga kadalag-an sa Wimbledon kag sa French kag US Opens.
Nalapawan sini ang record sang legendary tennis player nga si Rafael Nadal nga halin man sa Espanya nga nakalab-ot man sang amo nga achievement sa edad sini anay nga 24-anyos.
Ini naman ang una nga tion nga nalutos si Djokovic sa finals sang Australian Open. Antes sini, 10 ka beses siya nga nagdaog sa Melbourne.
Katapusan siya nga nakadala-pauli sang Grand Slam singles trophy sang 2023 kadungan sang US Open.
