Suspendido ang klase sa tanan nga lebel sa mga eskwelahan sa distrito sang Jaro, Iloilo City subong nga Lunes, Pebrero 2, kadungan sang pista ni Nuestra Señora dela Candelaria.
Kasunod ini sang pagpaguwa sang executive order si Iloilo City Mayor Raisa Treñas sang Sabado.
Suno sa alkalde, ginrekomendar ni Retired Police Colonel Uldarico Garbanzos, head sang Traffic and Transportation Management Office, ang suspension sang klase bangud sa natalana nga pagsirado sang mga mayor nga dalanon nga pagahiwatan sang religious celebration.
Sa executive order sang alkalde, gina-engganyo man sini ang mga institusyon ukon eskwelahan sa guwa sang distrito sang Jaro nga mag-suspend man sang face-to-face classes kun maapektuhan man sila sang pagsirado sang mga dalan kag serye sang religious kag cultural events sa pista.
Lakip sa nag-anunsyo man sang suspension apisar yara sa guwa sang distrito sang Jaro amo ang:
- Iloilo Science and Technology University
- West Visayas State University – Main Campus
- Western Institute of Technology
- University of San Agustin
- Hua Siong College of Iloilo – Ledesco Campus
Ginatugyan naman sang alkalde sa discretion sang mga pinuno sang government agencies kag sa mga private business owners kun maga-suspinde sila sang trabaho subong nga adlaw.#
Photo: Archdiocese of Jaro, Commission on Social Communications
