Ginaselebrar subong nga bulan sang Pebrero ang Civil Registration Month paagi sa ginpasar nga Presidential Decree No. 92, nga nagakilala sang dako nga papel sang Philippine Statistics Authority (PSA) sa pagproseso sang mga civil registry documents.
Sa interview sang Bombo Radyo kanday William Jaro, Chief administrative officer sang Philippine Statistics Authority Region 6 kag Jared Barile, Registration Officer III, ila ginpakigbahin ang importansya sang pag-proseso sang kaangay sini nga mga dokumento.
Suno pa sa ila nga ang Civil Registration Month nagapahanumdum sa publiko kun ano ka importante ang legal nga mga dokumento kaangay sang birth certificate, marriage certificate, kag death certificate, bangud ini amo ang nagapamatuod sang kinamatarong kag identidad sang isa ka tawo.
Dugang pa nila ang kada isa may kinamatarong nga makaangkon sang iya kaugalingon nga civil registry documents, bangud ini amo ang ginhalinan sang nagkalain-lain nga benepisyo kag serbisyo sang gobyerno, kaangay sang edukasyon, trabaho, health services, social protection, kag iban pa.
Ang ini nga mga datos ginahimo nga basehan sang gobyerno sa pagplano sang mga programa, paghatag sang serbisyo, kag paghimakas sang mga polisiya nga nagabase sa kahimtangan sang populasyon.
Para mas mapabaskog ang civil registration sa pungsod, ginpasakupan ini sang Inter-Agency Civil Registry System, nga ginalakipan sang nagkalain-lain nga ahensya sang gobyerno kaangay sang Department of Social Welfare and Development (DSWD), Department of Education (DepEd), kag Department of Justice (DOJ).
Ang ini nga mga ahensya nagabulig sa pagpalapnag sang ihibalo kag paghatag sang serbisyo agud mas mangin hapos ang pagrehistro sang mga tawo
Ginapanawagan man nila sa publiko nga mangin aktibo sa pagparehistro sang ila civil events, bangud ang legal nga mga dokumento indi lamang papel kundi pundasyon sang kinamatarong, identidad, kag oportunidad sang tagsa ka Pilipino.
