Ginakabig sang isa ka hepe sang kapulisan nga oportunidad sa pagpasangkad pa sang ila ihibalo kag pagpa-manggaranon sang ila eksperyensiya ang bag-o nga mga assignments nga ginhatag sa ila.
Isa na diri si Police Major Bryan Alamo, hepe sang Pototan Municipal Police Station, nga nalakip sa 46 ka mga hepe sa Region 6 nga gin-reassign.
Sa interview sang Bombo Radyo kay Major Alamo, iya ginpahayag nga ini nga assignment nagahatag sang dako nga oportunidad sa ila para sila makatuon sang bag-o nga mg eksperyensya bilang isa ka opisyal.
Ginpahayag man sini nga paagi sa pag-reassign sa ila, tion man ini nga magpakita sang maturity sa ila trabaho.
Ginpaathag man ni PMaj. Alamo nga sa kada police station nga iya ginhalinan, may yara gid sang nagkalain-lain nga personalidad kag estilo sang leadership, gani importante gid nga tun-an ang karakter sang mga tawo agud madali maka-adapt kag mangin epektibo sa pagpakig-angot sa komunidad kag sa kaupod nga kapulisan.
Dugang pa sini nga ang pinakadako nga leksyon nga iya natun-an amo nga ang kada assignment isa ka oportunidad para mangin handa sa mas mabug-at nga responsibilidad sa pagserbisyo sa mga tawo.
