Nabulgar kun ano ka agresibo ang China sa pag-agaw kag pang-angkon sang West Philippine Sea paagi sa transparency initiative sang gobyerno.
Sa interview sang Bombo Radyo kay Dr. Jeffrey Ordaniel, ang President kag Chief Executive Officer sang non-government, nonprofit, kag nonpartisan volunteer-based organization nga WPS Inc. ukon We Protect our Seas Inc., iya ginpahayag nga ginaguba sang sini nga polisa ang “salami slicing” strategy sang China.
Ini nga estratehiya sang China amo ang amat-amat lang nga pagpangkuha ukon pagpang-akon tubtub nga dalayon na nila nga makuha ang bilog nga teritoryo.
Ginhalimbawa sini ang pag-okupar sang China sa Mischief Reef sang 1995 kag ang standoff sa Scarborough Shoal ukon sa Bajo de Masinloc sang 2012. Halin sang amo nga tuig, didto na nagatinir ang mga barko sang China Coast Guard amo man ang militia vessels kag Navy.
Suno kay Ordaniel, bangud sa transparency initiative kun sa diin may Philippine Coast Guard kag may media nga aktibo sa pagbulgar sa pagka-agresibo sang China, gina-target naman nila subong ang Philippine officials partikular ang spokesperson sang PCG sa West Philippine Sea nga si Commodore Jay Tarriela nga amo ang pinaka-popular nga messenger sa amo sini nga isyu.
Pahayag sini, ginapaguwa sang Chinese officials nga ginaguba ni Tarriela ang relasyon sang Pilipinas kag China, apang ang matuod nila nga intensyon amo nga pauntaton ini sa pagwaragwag kun ano ang matuod nga hitabo sa EEZ sang Pilipinas.
Sa una nga tatlo ka semana sang 2026, at least 15 ka mga separado nga Facebook posts kag statements sang Chinese embassy ang naga-target kay Tarriela nga talalupangdon nga wala man nila anay ginahimo sang una sa iban nga Filipino officials.#
