Pabor si 2nd District Board Member June Mondejar sa pagbalik sang initial screening sa mga pasahero sa Iloilo International Airport.
Ini kasunod ini sang insidente nga natabo sang ligad nga shooting incident matapos nangtaya ang isa ka pasahero sang kutsilyo sa sulod sang airport.
Sa interview sang Bombo Radyo kay Mondejar, bilang Chair sang Committee on Public Order and Safety, iya ginpahayag nga kinahanglan nga unahon ang seguridad sang mga pasahero antes ang convenience.
Dugang pa niya, indi pwede nga isakripisyo ang seguridad sang mga pasahero sa pagpadali lang sang proseso sa pagpasulod sa airport.
Suno sa iya, ang pagbalik sang initial screening isa ka importante nga tikang agud mapabaskog ang seguridad sang publiko.
Dugang pa niya nga kun may isa ka indibidwal nga may plano nga magbuhat sang malain kinahanglan nga duwa ka screening ang agyan sini agud mangin gamay ang tsansa sini nga makahimo sang bisan ano nga malain nga plano antes pa makalab-ot sa pinakahulihi nga screening.
Suno pa sa iya nga naga-akomodar na ang Iloilo International Airport sang madamo nga mga international flights kag kinahanglan nga na-preparar na ang mga pasilidad nga kinahanglanon agud nga mangin matalunsay ang pag-proseso sang mga pasahero sa ila pagbyahe.
