Nagpain ang Iloilo Provincial Government sang P9 milyon nga pondo para sa pagbakal sang kapin 21,000 ka vial sang rabies vaccine nga gamiton sa tatlo ka bulan nga province-wide mass dog vaccination campaign nga ginlunsyar sini nga 2026.
Ginapangunahan ini sang Iloilo Provincial Veterinary Office (IPVO) nga may katuyuan nga mabakunahan ang indi magnubo sa 70% sang ginabulubanta masobra 337,000 ka ido sa bug-os nga probinsya.
Sa interview sang Bombo Radyo kay Dr. Darel Tabuada, Provincial veterinarian, iya ginpahayag nga ang kadalag-an sang kampanya nagadepende sa kooperasyon sang publiko kag sa responsable nga pagpanag-iya sang ila mga ido.
Suno sa Rabies Prevention and Control Accomplishment Report, sang 2025, nakapa-bakuna ang probinsya sang masobra 2, 800 ka mga ido ukon 78.69 percent sang ginabulubanta nga masobra 3,600 ka dog population.
Sa 43 ka banwa sang probinsya, ang Cabatuan amo ang nakaangkon sang 100 percent nga rabies vaccination coverage.
Gin-sundan ini sang Tigbauan, Banate, Leganes kag Igbaras.
Para man mapunggan ang pagdamo sang populasyon sang ido masobra 1,200 ka ido ang ginpa-kastrate.
Ginpahayag man ni Dr. Tabuada nga ang mga tag-iya sang ido may dakuonga papel sa kadalag-an sang programa.
Ginpangunahan ni Governor Arthur R. Defensor Jr. ang ini nga tatlo ka bulan nga mass dog vaccination program nga may katuyuan nga mapunggan ang rabies cases kag mangin sigurado ang kaluwasan sang publiko sa bug-os nga Iloilo.
Ang padayon nga vaccination drive kabahin sang mga tikang sang probinsya nga mangin rabies-free ang Iloilo antes mag-abot ang 2030.
