Natumbahan ang sa ka unit sang taxi matapos nga nalukat ang century old nga puno sang acacia sa bahin sang R. Mapa St., Mandurriao, Iloilo City pasado las-5 kaina sang aga bangud sa wala untat nga pagbubu sang ulan.
Sa interview sang Bombo Radyo kay Edever Cabril, driver sang amo nga taxi, iya ginpahayag nga nagpadulong ini sa lugar agud nga magpangape bangud yara gid sa tubang sang isa ka bakery ang nasambit nga puno sang acacia.
Hana nga nagwa ini sa iya taxi nga ginamaneho, nakabati ini sang pagragaak sang kahoy kag didto na sini nakita ang puno sang acacia nga natumba gani gilayun ini nga nagbalik sa sulod sang taxi.
Maswerte naman nga wala masamaran sang husto ang amo nga driver kag naka-angkun lamang sang pilas sa iya kamot tuga sang pagka-buka sang windshield sang taxi nga iya ginamaneho matapos nga napilpilan sang pila ka mga sanga sang amo nga kahoy.
Nagdangat naman sang pila ka oras ang clearing operations nga ginpatigayon sang katapo sang Bureau of Fire Protection (BFP) kag General Services Office (GSO) antes natigayun nga nakuha ang amo nga puno sang acacia.
