Kabahin ang Philippine National Police ukon PNP sa mga ahensya sang gobyerno nga nalakip sa direktiba sang Department of the Interior and Local Government ukon DILG sa Memorandum Circular No. 2026-006 ukon Anti-Epal Policy.
Madumduman nga ang nasambit nga direktiba amo ang pagdumili kag pagkakas sang mga pangalan, litrato, logo, initials, color motif, slogan officials, ukon ano man nga maangut sa public officials lakip na ang proponent mismo sa mga government funded projects.
Sa interview sang Bombo Radyo kay Police Major Lailyn Sencil, spokesperson sang Police Regional Office 6, iya ginpahayag nga bilang pagsunod sa nasambit nga direktiba, gina-monitor na sang Police Regional Office (PRO) 6 ang ila mga personnel agud masiguro nga wala sang nagalapas sa ginapatuman nga Anti-Epal Policy.
Ginpahayag man ni Sencil nga nagapangayo pa sila sang klaripikasyon halin sa Department od the Interior and Local government natuhoy sa mas detalyado nga aplikasyon sang polisiya sa bahin sang PNP.
Ini bangud nga ang PNP may yara na sang ginapatuman nga standard kag institutional identity base sa national guidelines sang organisasyon, lakip na ang disenyo sang ila mga pasilidad, markings sang mga police station kag police vehicles, kag amo man sa paggamit sang opisyal nga kolor kag logo sang PNP.
Dugang pa ni Sencil nga wala pa sang may na-monitor nga kaso sang paglapas sa nasambit nga polisa bangud padayon ang pagpatuman sang disiplina kag pagsunod sang mga police personnel sa mga patakaran sang organisasyon.
