Nakitaan sang litik ang bahin sang Esplanade sa Brgy. Mohon, Arevalo, Iloilo City matapos ang pag-inulan sang nagligad nga mga inadlaw.
Ginabulubanta nga yara sa tatlo ka pulgada ang buka sang litik, samtang yara sa 25 ka metros ang kalabaon sini.
Sa interview sang Bombo Radyo kay Punong Barangay Francis Acap sang Brgy. Mohon, Arevalo, Iloilo City, iya ginpahayag nga may nagpahibalo sa iya nga mga pumuluyo natuhoy sa litik nga nakita sa Esplanade.
Suno pa sa iya nagakahangawa sila tungod nga alagyan ini sang mga nagapaninda nga mga pumuluyo nga nagaagi sa nasambit nga lugar.
Suno pa kay Punong Barangay Acap, ang St. Gerard Construction Development Corp., amo ang nag-obra sang amo nga proyekto nga ginapanag-iyahan kag ginadumalahan sang Pamilya Discaya, kun sa diin naglab-ot sa masobra P90 million ang gin-alokar nga budget para diri.
Dugang pa ni Punong Barangay Acap, suno sa mga nakakita samtang gina-construct pa ang Esplanade, ang dose ka metros nga sheet pile nga dapat ibutang sa idalom, gin-utod pa sa tatlo ukon apat ka bahin.
Amo ini ang ginalantaw nga isa sa rason sang paglitik bangud indi masarangan sang sheet pile ang makusog nga current situation sang tubig kag manabaw ang paglubong sini, rason nga nag-ab-ab ang kilid sang nasambit nga porsyon sang Esplanade.
Nahibaluan nga may ara sang tatlo ka phase ang amo nga proyekto.
Sa karon, ang Phase 1 pa lamang ang natapos, samtang ang duha ka phase wala pa.
Lain-lain man ang budget sang tagsa ka phase sang proyekto, kag ang kalabaon sini halin sa Mohon Bridge asta sa Sto. Domingo.
Ang Phase 1 nagalaba lamang sang mga 300 ka metros.
Gin-umpisahan ang amo nga proyekto sang Enero 2025 kag nalab-ot subong nga tuig, apang gin-untat anay ang operasyon sang proyekto.
Ginalauman sang Barangay nga masekyar ang lugar sang siyudad agud mahatagan sang nagakaigo nga tikang ukon solusyon ang amo nga problema.
Nagpanugyan man si Punong Barangay Acap sa iya mga pumuluyo nga mag-aligmat ilabi na ang mga yara malapit sa suba, agud mangin handa sila kun may matabo, bangud kon nag-umpisa na ini guba, mahimo ini magapadayon kag mangin delikado para sa mga nagaestar sa kilid sang suba.
