Ginklaro sang Highway Patrol Group (HPG) Iloilo nga may ginasunod nga mga proseso ang tanan nga kaso nga may kaangtanan sa dalanun antes ini ideretso sa ila talatapan.
Sa interview sang Bombo Radyo kay PMaj. Ryan Palaran, Team Leader sang Provincial Highway Patrol Team Iloilo, iya ginpahayag nga suno sa PNP Memorandum Circular 2025-049 ukon ang “Reporting and Disposition of Stolen and Recovered or Impounded Motor Vehicles,” nagakadapat anay nga magpalapit sa lokal nga kapulisan ang tagreklamo agud magpasaka sang blotter report antes ini i-refer sa HPG.
Dugang pa ni Palaran nga pagkatapos sang pagpablotter, maga-coordinate ang mga ini sa territorial police agud hibaluon ang sitwasyon kag makabulig sa imbestigasyon sang kaso.
Ini nga klaripikasyon sang HPG Iloilo ang sabat sa pila ka mga palamangkutanon sang mga biktima sang sunod-sunod nga kaso sang motornapping sa siyudad sang Iloilo.
