Ginakabig sang Highway Patrol Group (HPG) nga patalang ang paggamit sang bayo sang Criminology kag may logo sang Philippine National Police (PNP) sang isa ka suspek sa kaso sang motornapping sa Quintin Salas, Jaro, Iloilo City.
Sa interview sang Bombo Radyo kay PMaj. Ryan Palaran, Team Leader sang Provincial Highway Patrol Group, iya ginpahayag nga ini ang resulta sa imbestigasyon nga ginapatigayon sang ila talatapan kun sa diin nagapakig-angot man sila sa intelligence community.
Suno pa kay Palaran ila nga ginasundan ang mga CCTV footages nga nahamtang sa lugar, ang direksyon nga ginhalinan sang motor agud makadugang sa ila nga pag-imbestigar kag mahibaluan kun sin-o ang suspek sa likod sang motornapping.
Suno pa sa iya, wala pa makilal-i ang suspek bangud indi klaro ang itsura sini kay naga-takilid sa Closed Circuit Television nga amo ang isa sa ila ginabasehan sa imbestigasyon.
Suno pa kay Palaran indi buluhaton sang isa ka pulis ang kaangay sini nga pagpangawat kag isa ka criminal ang nagbuhat sini.
Dugang pa niya nga indi sila mag-untat sa ila imbestigasyon tubtob nga indi pa makilal-an kag madakpan ang suspek.
