Ginpa-Bombo ni Punong Barangay Pancho Vijuan sang Brgy. Loboc, Lapuz ang mga nagalapta nga basura sa dalan sakop sang Coastal Road.
Ini matapos nga makit-an nga may ara sang tinumpok nga basura kag guba nga mga appliances ang nahamtang sa lugar.
Sa interview sang Bombo Radyo kay Punong Barangay Vijuan, iya ginpahayag nga wala man sila sang ideya kun sin-o nga mga indibiwal nga nagalapta sang basura bangud indi man nila ini ma-monitor.
Apang pahayag man sang opisyal, dako ang posibilidad nga halin ini sa junkshop kag hungod nga ginabilin sa tion sang kagab-ihon agud nga wala sang makakita.
Nagapati man ini nga wala naghalin ang basura sa mga residente sang barangay bangud nga may ara sila sang regular nga garbage collection kada semana kag ila man nga gina-monitor ang basura sang ila nga mga pumuluyo.
Dugang pa niya nga magapatigayon sila sang clean-up drive sa masunod nga semana kaupod ang isa ka pribado nga organisasyon agud nga matinluan na ini.
Nagapangabay man ini sa kun sin-o ang nagapanag-ya sang mga basura kag iban pa nga mga gamit nga kuhaon kag tinluan nalang nila ini bangud nga magapangatubang sila sang penalidad kun sila ang madakpan.
