Ginalauman sang Filipina golfer nga si Rianne Malixi ang isa ka mapag-on nga pagbalik sa iya sports career subong nga tuig 2026 samtang maga-compete ini sa Women’s Amateur Asia-Pacific (WAAP) Championship sa New Zealand.
Ang 18 anyos nga Filipino player, nga sa karon ika-21 sa World Amateur Golf Ranking, nakaagom sang back injury sang 2025 nga nakaapekto sa iya performance, lakip na diri ang pagkapaslaw sini nga maka-podium sa Southeast Asian Games.
Pagkatapos sang pila ka bulan nga therapy kag rehabilitasyon, nagpakita sang pagbangon si Malixi kag nangin runner-up pa ini sa Espirito Santo Trophy kag nagdaog sang iya una nga U.S. collegiate tournament para sa Duke University.
Sa iya ika-anom nga pagpasakop sa Women’s Amateur Asia-Pacific (WAAP), nagalaom ini nga magadaog para sa iya pinakadako nga comeback sa iya amateur career.
Maatubang ni Malixi ang pila ka mga mabaskog nga mga kontra, lakip ang defending champion nga si Jeneath Wong sang Malaysia.
Nahibaluan nga wala pa sang Pilipina nga nakadaog sa Women’s Amateur Asia-Pacific (WAAP) halin sang pagsugod sini sang tuig 2018.
