Ikaw bala nagapanag-iya sang motorsiklo kag ari ikaw diri sa Siudad sang Iloilo?
Ka-Bombo, halungi gid ang imo motorsiklo kun indi mo gusto nga mangin ikaanom nga biktima sa serye sang motornapping nga mga kaso.
Humalin sang Enero tubtob subong nga tunga-tunga sang Pebrero, may lima na ka mga kaso sang pagpangawat sang motorsiklo.
Yari ang lima ka mga insidente sang motornapping nga narekord sang Bombo Radyo:
- Sang Enero 14 sa Barangay San Antonio, Molo, ginkawat sang duha ka mga lalaki ang motorsiklo nga ginapanag-iyahan ni alyas Part. Nabilin sini ang yabe sa motorsiklo rason nga madasig nga nakawat sang mga suspek nga sanday alyas Vince kag alyas Jr. Sa maabtik nga pag-backtrack sang mga CCTV, nadakpan ang mga suspek kag narekober ang motorsiklo.
- Sang Enero 14 sa E. Lopez, Jaro, ginkawat man ang isa ka XRM 125 nga duag puti kag mga plate number F7964K. Naga-park lang ini sa kilid sang karsada sang ginkawat sang wala makilal-an nga lalaki. Nakuhaan sang CCTV footage ang pagtaban sa motorsiklo.
- Sang Enero 31 sa Tagbak Terminal, Jaro, nadula man ang motorsiklo ni Butch Marterior. Nakuhaan sang CCTV footage ang pagkawat sang motorsiklo apang madulom ang kuha bangud gab-i natabo ang pagpangawat.
- Sang Pebrero 3 sa Brgy. Quintin Salas, Jaro malapit sa Land Transportation Office, ginkawat ang motorsiklo nga ginapanag-iyahan ni ZJ Cenar. Nagkadto ini sa LTO agud magproseso sang iya nga lisensya apang sang nagbalik ini, wala na ang iya motorsiklo. Ang ginkawat nga motor amo ang XRM 125, 2017 model, nga duag black kag silver, kag may plate number nga 665FAJ. Tubtob subong, wala masolbar ang kaso.
- Sang Pebrero 11, sa Brgy. Quintin Salas, Jaro malapit sa isa ka fastfood, ginkawat ang XRM Honda nga may duag pula, puti kag itom kag may temporary plate number nga 080103. Ginbilin ini sang mag-utod nga estudyante apang sang nagbalik sila, nadula na ang motorsiklo. Wala pa nakilala ang suspek. My CCTV footage man ang pagtaban sang suspek sa amo nga motorsiklo.
Sa lima ka mga insidente, apat gid ang natabo sa Jaro kag wala gid sang bisan isa ang nadakpan.
Ginalantaw man ang posibilidad nga pareho lang ang tawo sa likod sang sini nga motornapping sa Jaro.
ANO ANG TIKANG SANG PNP?
Padayon pa ang imbestigasyon sang otoridad sa pagpanguna ni PCol. Wilbert Parilla nga OIC director sang Iloilo City Police Office.
Ginausisa man sang maayo ang mga CCTV footages agud madasig nga makilal-an ang mga suspek.
Nagpahanumdom man ini sa publiko nga magdoble-halong ilabi na kun naga-park sa pampubliko nga lugar paagi sa pagsiguro nga naka-lock ang motorsiklo kag wala nabilin ang yabe.
Dugang niya, kun mabiktima gid man sang motornappers, mas mayo nga mag-report gilayon sa otoridad agud madasig nga makaimbestigar kag malagas ukon mapangita ang mga kawatan.
