Pilason ang lalaki matapos mabun-an sang iya boardmate nga ginpahayag nga ginlingling niya samtang nagapakighilawas sa iya girlfriend sa West Habog-habog, Molo, Iloilo City sang Pebrero 13, 2026.
Ang biktima amo si alyas Raymond, driver, samtang ang suspek amo si alyas Janjan, pahinante, lunsay pangayaw kag legal ang pang-edaron.
Sa interview sang Bombo Radyo kay Police Captain Ryan Christ Inot, hepe sang Iloilo City Police Station 4, iya ginpahayag nga isa lang ka boarding house ang ginatiniran sang suspek kag biktima kun sa diin ginaakupa ni alyas Raymond ang lower bunk kag sa upper bunk naman si alyas Janjan.
Base sa imbestigasyon, kun kaisa, ginahulam ni alyas Janjan ang kwarto kun magkadto ang iya nobya.
Dugang pa sang natungdan nga nagkomprontahanay ang duha bangud nga ginapalapta sang biktima nga nakita niya ang suspek kag ang iya nobya nga nagapakighilawas.
Didto na nabun-an ang biktima.
Gilayon nagpalagyo ang suspek padulong sa Baluarte, apang na-recover ang gin-gamit sini nga kitchen knife.
Yara naman sa estable nga kondisyon ang biktima matapos nakaagum sang pilas sa iya wala nga butkon.
Posible nga magpangatubang sang kaso nga frustrated homicide ang suspek sa tion nga magpasaka na sang reklamo ang biktima.
Reported by: Bombo Phauline Pillora
