Nagpanawagan ang isa ka international rights group sa International Criminal Court (ICC) nga gilayon magpagwa sang arrest warrants batok sa mga former kag current official sang gobyerno nga ginakabig sang ICC bilang “co-perpetrators” sa ginapahayag nga crimes against humanity nga may kaangtanan sa war on drugs ni anay Presidente Rodrigo Duterte.
Sa pahayag sang International Coalition for Human Rights in the Philippines (ICHRP) chairman nga si Peter Murphy, iya ginpunto nga dapat maupod sa imbestigasyon ang mga ginhingadlan nga opisyal kag indi pagbay-an nga magpabilin nga hilway ang mga bangud posible nga maapektuhan ang ebidensya kag ma-intimidar ang mga testigo.
Matandaan nga gindeklarar sang ICC nga lakip sa ginhingadlan sanday Senators Bato dela Rosa kag Bong Go, anay Justice Secretary Vitaliano Aguirre, kag pila ka anay hepe sang Philippine National Police.
Ginpanindugan naman nanday Go kag Aguirre nga wala sila sang kahilabtanan sa amo nga alegasyon.
Gintawag ni Go ini nga “baseless” nga akusasyon, samtang nagpahayag si Aguirre nga magapaidalom siya sa legal nga proseso kun may warrant nga ipagwa ang ICC kag indi ini magpanago.
Sa karon, nakatalana sa Pebrero 23 ang confirmation of charges hearing batok kay Duterte, nga yara sa kustodiya sang ICC.
