Suportado sang Malacañang ang panawagan sang pila ka mga mamalidha kag mga grupo nga magpatigayon anay ang Department of Education (DepEd) sang masangkad nga konsultasyon kaangot sa ginaduso nga pag-shift sa trimestral system umpisa sa masunod nga tuig.
Suno kay Palace Press Officer Undersecretary Claire Castro, importante nga madiskusyunan anay ini sang stakeholders kag tanan nga mga partido agud nga mangin maayo man ang implementasyon sang programa para sa mga estudyante.
Sa matandaan, sang nagligad nga semana, ginpresentar ni Education Secretary Sonny Angara ang amo nga proposal agud nga himuon na lamang nga tatlo ang subong apat ka grading period sa kada school year.
Ginakonsiderar suno sa DepEd ang implementasyon sang trimester system sa School Year 2026–2027 sa mga pampubliko nga mga eskwelahan.
Ini ang ginalantaw sang ahensya nga “holistic approach” agud nga mapaayo ang learning continuity kag mabuhinan ang administrative workload sang mga manunudlo.
Sandig kay Angara, magabukas ang klase sa Hunyo, kag ang una nga trimester maga-umpisa sa Hunyo-Septyembre; sundan sang second-trimester halin sa Septyembre-Disyembre; kag sundan sang third trimester halin Enero-Marso.
Una naman nga nagpanawagan si Senator Bam Aquino, chairperson sang Senate committee on basic education, nga magpatigayon anay sang inquiry sa amo nga proposal sa baylo nga dali-dalion ang implementasyon.
Nagpabutyag naman sang pagpangduha-duha ang Alliance of Concerned Teachers – Philippines sa proposal bangud indi man ini makasolbar suno sa ila sa krisis sa edukasyon sa Pilipinas.
