Nagpasalig si Iloilo City Mayor Raisa Treñas nga ang tanan nga pamilya nga naapektuhan sang sunog sa Barangay Benedicto, Jaro ang makabaton sang financial assistance.
Sa interview sang Bombo Radyo kay Joy Fantilaga-Gorzal, spokesperson ni Mayor Treñas, iya ginpahayag nga buligan sang Iloilo City Government ang 83 ka mga households nga apektado sang insidente agud makabangon kag makasugod liwat sa ila pagpangabuhi.
Base sa latest nga nga narekord sang syudad, naglab-ot na sa 106 ka pamilya ukon 366 ka indibidwal ang naapektuhan sang sunog.
Sa amo nga numero, tatlo ka balay ang partially damaged samtang 80 naman ang totally damaged.
Sa karon, may 88 ka pamilya nga ginabug-usan sang 317 ka indibidwal ang nagatinir subong sa evacuation center.
Gin-activate man sang City Government ang community kitchen nga sa subong nagaserbe sang pagkaon sa mga evacuees.
Padayon man ang koordinasyon sang mga city department kag barangay officials agud mapadasig ang paghatag sang bulig kag suporta sa mga apektado sang sunog.
