Imbitaran sang 15th Sangguniang Panlalawigan ang Department of the Interior and Local Government Region 6 agud nga maklaruhan ang provincial board nahanungod sa memorandum nga nagadumili sa pagbyahe sang mga government owned vehicles kun weekend kag holiday.
Ang DILG Memorandum Circular No. 2026-011, amo ang nagalakip sa tanan nga opisyal kag ahensya sa idalom sang DILG nga nagapaandam sa kun sin-o man ang magabayolar ang magapangatubang sang Administrative ukon Criminal liabilities santo sa existing laws, rules, kag regulations.
Sa interview sang Bombo Radyo kay Vice Governor Nathalie Ann Debuque, iya ginpahayag nga sa question hour sa 31st regular session sang Sangguninang Panlalawigan, nagpahayag ang pila ka mga board members nga
luyag nila nga maklaruhan nahanungod sa nasambit nga memorandum.
Suno kay Debuque, indi gid malikawan nga kun kaisa may ara sang mga adlaw kun sa diin ginaimbitaran sila ukon may responsibilidad sila bilang isa ka public official bisan pa nga weekend ukon holiday.
Pahayag man sang bise gobernador, mas maayo nga mapalab-ot sang DILG ang mas klaro nga pagsulundan para sa ila agud nga mas mahibal-an sang mga opisyal ang limitasyon sang nasambit nga memorandum.
