Liwat nga nagapang-agda sa publiko ang Simbahan Katoliko nga mag-upod sa prayer rally sa siudad sang Iloilo sa Pebrero 25, kadungan sang 40th Anniversary sang EDSA People Power Revolution.
Sa interview sang Bombo Radyo kay Jaro Archdiocesan Social Action Center Director Msgr. Meliton Oso, iya ginpahayag nga indi lang pagdumdom sa mga hitabo sang EDSA People Power Revolution ang ila nga tinutuyo, kundi amo man ang pagpanawagan nga tapnaon ang kurapsyon sa pungsod.
Suno kay Oso, kaangay sang EDSA People Power Revolution, may gahum gid ang pumuluyo nga mapahalin sa pwesto ang mga tawo sa likod sang malaot nga pagpangurakot sa kwarta sang banwa.
Nahibaluan nga magaupod man ang nanuhay-tuhay nga grupo ukon sektor sa patigayunon nga prayer rally.
