Magadeploy sang masobra 1,900 ka mga police personnel ang Iloilo City Police Office para sa paalabuton nga 49th High-Level Task Force on ASEAN Economic Integration sa Pebrero 25 tubtob Pebrero 27,2026.
Ini agud nga mahatag ang nagakaigo nga seguridad sang tanan nga mga delegado.
Sa interview sang Bombo Radyo kay PCOL. Wilbert Parilla, Officer-in-Charge sang ICPO, iya ginpahayag nga subong nga adlaw, may ara sang pagahiwaton nga send-off ceremony kun sa diin magaumpisa diri ang pagdeploy sang mga kapulisan sa nagkalain-lain nga area sa siudad.
Pahayag man niya nga magabukas man subong ang Multi-agency coordinating center bangud nga ginalauman nga amat-amat na nga magaabot ang mga participants sa sabado kag dominggo.
Agud man nga masiguro ang kalinungan sa siudad, naghatag man sang suhestyon si Parilla sa Regional Civil Security Unit para patigayunon ang gun ban sa siudad sang Iloilo.
Nahibaluan nga suspendido naman ang face-to-face classes sa Pebrero 25 tubtob Pebrero 27 matapos nga gin-aprubahan ni Iloilo City Mayor Raisa Treñas ang rekomendasyon sang Iloilo City Police Office nga kanselahon ang klase para sa paalabuton nga aktibidad sa siudad
