Gin-aprubahan sang International Criminal Court (ICC) Pre-Trial Chamber 1 ang request ni former President Rodrigo Duterte nga indi ini magtambong sa confirmation of charges hearing sa masunod nga semana.
Magapadayon ang hearing bisan wala ang 80-anyos nga former president.
Nag-desisyon ang judges nga valid ang waiver ni Duterte kag natumod nga nahangpan sini ang iya kinamatarong kag ang legal nga mga kunsekwensya.
Ginklaro man sang Chamber nga boluntaryo ang pag-absent ni Duterte sa hearing kag wala sang kaangtanan sa iya nga ikaayong lawas, bangud na-resolba na ang isyu kag nadeklarar na siya nga fit sa pagpartisipar sa proceedings sandig sa medical examination nga gin-conduct sang independent panel of experts.
“The Chamber hereby grants the request; decides that the hearing on the confirmation of charges will be held in the absence of Mr. Duterte,” suno sa Chamber sa desisyon nga ginpaguwa subong nga Pebrero 20.
Ginmanduan man sang korte ang kampo ni Duterte, ang prosecutors, kag ang common legal representatives sang mga drug war victim nga i-indicate kun may filings nga dapat isapubliko ukon dapat i-redact ukon tabunan.
Sandig sa schedule sang ICC, matabo ang confirmation of charges hearing sa Pebrero 23, Pebrero 24, Pebrero 26, kag Pebrero 27.
Matandaan nga nagpahayag si Duterte nga indi na siya mag-attend sa legal proceedings nga malipatan man gilayon niya, ilabi na bangud tigulang na siya suno sa iya, madali makapoy, kag maluya. Ginklaro man niya nga wala niya ginakilala ang hurisdiksyon sang ICC sa iya.
Sa proceedings sa masunod nga semana, manguna si Presiding Judge Iulia Antoanella Motoc kag pagaupdan sang duha ka iban pa nga judges nga sanday Reine Adélaïde Sophie Alapini-Gansou kag María del Socorro Flores Liera.
Diri nga stage maga-deliver ang prosecutors, defense lawyers, kag legal representatives sang oral arguments sa merito sang kaso. Kun may isa ukon masobra pa nga charges nga makumpirma, ipasaka ini sa masunod nga stage sang proceedings nga amo ang trial.#
