Ginpakigbahin sang duwa ka mga environmental advocates diri sa Iloilo ang ila adbokasiya nahanungod sa pagtukod sang proyekto nga Basaranggola kun sa diin ikatalo na ini nga tuig nga ginapatigayon.
Sa interview sang Bombo Radyo kanday Mayzl Domingo, Co-founder sang Luntian PH kag Riza Ornos, Co-Founder sang Earthing PH, ila ginpahayag nga padayon ang ila kolaborasyon agud mapalapnag sa mga tawo ang ihibalo nahanungod sa problema sang basura kag single-use plastics sa komunidad.
Suno pa sa ila nga tuman ka importante nga mahibaluan sang publiko ang importansya sa pagtipig sang palibot kag pagpabilin nga mangin manami ini.
Ginpunto man sang mga ini kun ano ka makatalagam ang dala sang isa single straw kun sa diin nagaabot sang masobra 200 ka tuig antes mag-decompose, samtang ang plastic bottles nagaabot naman sang 440 ka tuig antes ini madunot.
Suno pa sa ila, ang Basuranggola may inisyatibo nga mapataas ang awareness sang komunidad sa nagakatabo sa palibot.
Ma-edukar ang publiko sa epekto sang basura kag climate change ang mas madamo nga environmental advocates
Nagapangimbita gid ang Luntian PH kag Earthing PH sang madamo nga participants agud mag-upod sa aktibidad nga pagahiwaton sa Abril 25 agud makaganyat pa sila sang madamo nga participants sa ila adbokasiya nahanungod sa environmental education.
