Nagapangayo si Pavia Mayor Laurence Gorriceta sang klaro kag insakto nga imbestigasyon halin sa kapulisan may kaangtanan sa duha ka magsunod nga insidente nga natabo sang nagligad nga gab-i Pebrero 23 sa banwa sang Pavia.
Ini matapos nga wala nagasanto ang mga statement kag imbestigasyon nga ginpagwa sang Pavia Municipal Police Station, Criminal Investigation and Detection Group
(CIDG) Iloilo kag Police Regional Office (PRO) 6.
Sa interview sang Bombo Radyo kay Pavia Mayor Laurence Gorriceta, iya ginapahayag nga nagapanawagan ini nga kuntani hatagan sang atensyon ni PRO 6 Director PBGen. Josefino Ligan kag Provincial Director PCol. Bayani Razalan ang nasambit nga mga insidente agud nga mahatagan ini sang insakto kag klaro nga imbestigasyon.
Pahayag pa niya, tuman ini ka dismayado sa natabo nga imbestigasyon sang Pavia Municipal Police Station.
Dugang pa ni Mayor Gorriceta, magahulat ini sang lihuk nga pagaubrahon sang mga otoridad kag dapat pasabton ang mga dapat manabat sa natbo nga insidente.
Sa kaangot nga balita, dismayado man si Mayor Luigi Gorriceta sa performance ni Police Captain Ritz Presquito sa pag-imbestigar sa gina-alegar nga abduction incidents nga natabo sa ila banwa.
Pahayag pa sang alcalde nga kun indi mahatagan sang solusyon maga-request ini sang replacement ni PCapt. Presquito.
Dugang pa sang alcalde nga indi man ini satisfied sa trabaho sang Pavia Municipal Police Station.
Sa matandaan nga sa idalom man ni Pcapt. Presquito natbo ang pagsulod sang Termite gang sa isa ka jewelry shop sang Pamilya Gorriceta sa nasambit nga banwa.
