Pangunahan sang Archdiocese of Jaro ang pagpangamuyo kag prusisyon kadungan sang ika-40 nga anibersaryo sang EDSA People Power Revolution subong nga adlaw, Pebrero 25.
Isa ini sa 86 ka mga diocese kag archdiocese nga magahiwat sang kaangay sini nga aktibidad sa lain-lain nga bahin sang pungsod.
Sa interview sang Bombo Radyo kay Msgr. Meliton Oso, director sang Jaro Archdiocesan Social Action Center (JASAC), iya ginpahayag nga diri sa Iloilo, gin-organisar ini sa pagpanguna sang Commission on Laity nga ginabuylugan sang nagkalain-lain nga religious organizations kag mandated organizations.
Sandig sa schedule sang simbahan, alas dos karon sa hapon, magatipon ang mga katapo sang Commission on Laity kag nagkalain-lain nga mga parokya para sa Novena sa St. Clement’s Church.
Halin sa amo nga simbahan, patigayunon ang prusisyon padulong sa Jaro Cathedral kaupod ang imahen sang Mahal nga Birhen sang Guadalupe kag imahen sang Mahal nga Birhen sang Fatima.
Samtang padayon ang prusisyon, maga-pangamuyo ang tanan sang Santos nga Rosaryo.
Alas kwatro sa hapon naman ang Santos nga Misa sa Jaro Metropolitan Cathedral nga pangunahan ni Jaro Archbishop Most Reverend Midyphil B. Billones, D.D. kaupod ang iban nga kaparian.
Pagkatapos sang misa, may patigayunon nga candle-lighting nga amo ang pagtakop sang mobilisasyon sa amo nga adlaw.
Matandaan nga may duha na ka hugnat sang Trillion Peso March nga natabo sang Septyembre 21 kag Nobyembre 30, 2025, apang ini nga mobilisasyon suno kay Msgr. Oso amo ang “very prayerful” nga akto nga may yara sang misa kag prusisyon sa baylo sang nakaandan nga martsa.
Ginapangabay man sang Archdiocese of Jaro sa mga maga-upod sa prusisyon nga magsuksok sang puti nga panapton sa amo nga adlaw.
PANAWAGAN BATOK SA POLITICAL DYNASTY
Ipanawagan man sang Simbahan Katolika kadungan sang mobilisasyon angpagtapna sa political dynasties sa Pilipinas.
Sa interview sang Bombo Radyo kay Msgr. Oso, iya ginpahayag nga ini nga dinastiya amo man ang ugat sang kurapsyon.
Ipangamuyo kag ipanawagan sang Simbahan nga mangin sinsero kag seryoso man ang Kongreso sa pagpasar sang mga hagna batok sa nakaandan nga pagpasa-pasa sang gahum sa magpamilya sa pulitika.
Ginbalikan sang JASAC Director ang statement nga gin-isyu sang Catholic Bishops Conference of the Philippines-Episcopal Commission on Catholic Education, Catholic Educational Association of the Philippines, kag iban pa nga nagapanawagan sa paglakip sang pila ka mga probisyon sa anti-political dynasty bills nga pareho nga pending sa Kamara kag Senado.
Sandig sa ginaduso sang church-based groups, limitahan lamang sa “maximum of two relatives per family” ang makauyat sang elective position nga isa sa local office kag isa sa national position kag indi dapat mag-overlap ang jurisdiction.
Ginsuhestyon man nga indi pagpasugtan ang mga maghimata tubtub sa fourth civil degree of consanguinity ukon affinity nga dungan nga makapungko sa elective positions.
Pahayag ni Oso, nagalaum ang Social Action Network sang Simbahan nga indi pakulahaw kag indi lunsay lip-service lang ang ginaproponer nga mga hagna.
Matandaan nga nagmandu si President Ferdinand Marcos Jr. sa Kongreso nga hatagan sang prayoridad ang legislation nga amo ang magadumili sang political dynasties.
Kabug-usan nga 24 ka anti-political dynasty bills ang na-file subong sa Kamara kag Senado lakip na ang House Bill 6771 nga ginduso nanday Speaker Faustino “Bojie” Dy kag presidential son kag House Majority Leader Ferdinand Alexander Marcos.#
