Hangkat ni Kaufman kun imbestigaran man sang ICC ang ‘vigilante killings’ sa Marcos admin, ginsabat sang prosekusyon

Ginsabat sang prosekusyon ang pamangkot sang defense kun may maga-imbestigar man bala sa “vigilante killings” nga nagakatabo sa idalom sang Marcos administration.

Sang Huwebes sang gab-i, matandaan nga sa isa ka bahin sang presentasyon sang defense counsel nga si Atty. Nicholas Kaufman, ginsiling sini nga nagpadayon man ang pagpamatay sang state forces bisan nga wala na si Duterte sa pwesto.

Ginpresentar pa sini ang data kun pila ang mga kaso sang pagpamatay sa idalom sang Marcos administration, kag ginpamangkot sini ang prosecutors kun imbestigaran man bala nila ini.

“Clearly, I’m forced to ask myself whether anyone on the other side of this room has thought of investigating the Marcos regime and the related phenomenon and holding someone accountable,” pamangkot ni Kaufman sang tion nga siya ang nagpresentar sang iya argumento.

Ginhingalitan naman ni Prosecution senior trial lawyer Julian Nicholls ang iya tion sa closing statement kagab-i agud nga sabton ang pamangkot ni Kaufman.

Suno kay Nicholls, si Duterte mismo nga kliyente ni Kaufman ang may kahimuan kun ngaa indi na sila maka-imbestigar bangud sang pag-withdraw sang Pilipinas sa Rome Statute.

“He [Kaufman] made a small point I just have to respond to, making a call, ‘Why are there more investigations?’ ‘Why are crimes being investigated now in the Philippines?’ Well, his client prevented all that by withdrawing the Philippines from the Rome Statute when he thought he might be prosecuted. Thereby ensuring that we would not have jurisdiction after a certain period,” suno kay Nicholls.

Matandaan nga sang 2018 sang gin-anunsyo ni Duterte ang pag-withdraw sa ICC nga naka-base sa The Hague matapos nga gin-umpisahan sang tribunal ang imbestigasyon sa iya nga drug war. Marso 2019 naman sang pormal nga nag-withdraw ang pungsod sa Rome Statute.

Apisar sadto, ginapanindugan sang korte nga may hurisdiksyon pa ini sa mga krimen nga ginaalegar nahimo ni Duterte sa tunga-tunga sang Nobyembre 2011 kag Marso 2019 nga amo ang naga-cover sang termino ni Duterte bilang mayor sa Davao City kag bilang presidente sang Pilipinas.

Sa closing statement sang prosekusyon kagab-i, nangin mabakod man ang rebuttal sini batok sa mga naratibo sang defense, particular na sa isyu sang death squad. Suno kay Nicholls, “The facts can’t be denied by these sprinklings. He ran a death squad in Davao that he created. He ran it for 20 years before he became president. His promise was to kill thousands, and he did.”#