Nagapreparar na ang Barangay Calumpang, Molo Iloilo City may kaangtanan sa Fire Prevention Month nga magasugod na buwas nga bulan sang Marso.
Ini agud malikawan ang sunog pananglitan magluntad sa lugar.
Sa interview sang Bombo Radyo kay Lolita Maprangala, Punong Barangay sang Barangay Calumpang, Molo Iloilo City, iya ginpahayag nga may yara sang ginabulubanta 2,000 ka mga panimalay sa ila lugar kag kadam-an diri ang nagatinupaday gani kinahanglan gid nga maghanda.
Ginakabig man nga ang makitid nga dalanon ang isa sa problema sang barangay bangud wala man sang nagakaigo nga parkingan ang mga salakyan nga ginapanag-iyahan sang mga residente.
Ini magaresulta sang kabudlayan sa mga bombero pananglitan kinahanglan nga magresponde kun may magluntad nga sunog sa lugar.
Dugang pa diri may yara man sang isyu may kaangtanan sa deed of donation kun sa diin kinahanglan kuntani sang dugang nga space sa dalan para mapamaayo sa tion sang pagresponde.
Ginpahayag man ni Maprangala nga ginatudluan man sini ang iya mga pumuluyo sa pagpatigayon sang “Bayanihan system” agud magbuligay ang mga ini kun may emerhensya.
Padayon naman ang panawagan sang BFP sa publiko nga magbinantayon kag mangin responsable agud malikawan ang sunog, labi na sa mga barangay nga ginakabig nga fire-prone.
Nahibaluan nga suno sa Bureau of Fire Protection Iloilo City nga 125 sa kabug-usan nga 180 ka mga barangay sa Iloilo City ang ginakabig nga fire-prone ukon mataas ang risgo sa sunog.
Bangud sini, ginaduso sang ahensya ang mas hugot nga kampanya sa fire prevention, labi na subong nga magasugod na ang Fire Prevention Month sa bulan sang Marso.
