Gin-umpisahan na sang Iran ang 40 ka adlaw nga mourning period matapos nga napatay ang ila Supreme Leader nga si Ali Khamenei sa pagpang-atake sang Israel kag Estados Unidos sa Amerika.
Magluwas diri, may gindeklarar man si Iranian President Masoud Pezeshkian nga pito ka adlaw ukon isa ka semana nga public holidays.
Kahapon sang aga oras diri sa Pilipinas sang ginkumpirma na sang Iran ang pagtaliwan sang 86-anyos nga Supreme Leader.
Antes ang amo nga kumpirmasyon, nauna na ini nga ginpadayaw nanday US President Donald Trump kag Israeli Prime Minister Benjamin Netanyahu.
Para naman sa presidente sang Iran, ang kamatayon sang ila Supreme Leader ang makabig nga hayag nga deklarasyon sang gyera batok sa mga Muslim sa bisan diin nga parte sang kalibutan.
Magluwas sa Supreme Leader nga amo ang nagapamuno sa Iran halin sang 1989, napatay man ang matag-as nga security officials sang Iran, kag ang bata nga babaye ni Khamenei, iya umagad, kag iya nga apo.
Patay man si Ali Shamkhani nga amo ang adviser sang Supreme Leader.
Sa bahin sang pwersa-militar, napatay si Islamic Revolutionary Guard Corps Commander-in-Chief Mohammad Pakpour kag ang duha pa ka senior commanders nga sanday Abdolrahim Mousavi nga Chief of Staff sang Iran Armed Forces kag si Aziz Nasirzadeh nga defense minister sang amo nga pungsod.#
