Posible nga aprubahan ang provisional fare hike para sa tanan nga pampubliko nga transportasyon pananglitan maglab-ot sa P60 kada litro ang presyo sang diesel ukon krudo.
Suno ini kay Land Transportation Franchising and Regulatory Board (LTFRB) Chairman Vigor Mendoza samtang nga ginaantisipar na ang epekto sang nagapadayon nga gyera sa Middle East.
Suno kay Mendoza, ini nga tikang ang makabulig nga mapahagan-hagan ang palas-anon sang public utility vehicle (PUV) drivers kag operators, samtang ginakonsiderar man ang ikaayo sang mga pasahero.
Pananglitan magtahaw na ang tension sa Middle East kag magnubo naman ang presyo sang produktong-petrolyo, iga-withdraw man ukon bawion gilayon ang pagpasaka sa plete.
Gin-athag sini nga indi man nila luyag nga sukton sang mahal ukon i-overcharge ang mga pasahero.
Ginpasalig man sang chairman nga ang una nga himuon sang ahensya amo ang paghatag sang fuel subsidies sa PUVs sa baylo nga magpasaka sang plete.
Handa na ang LTFRB suno sa iya sa pag-umpisa sa pag-release sang subsidiya kun maglab-ot na ang presyo sang Dubai crude oil sa $80 per barrel.
“We are more ready than before, in the sense na ang dami na nating prep work na ginagawa, not only here in the central office, but even down to the ground, yung regional offices natin, na masama lahat ng dapat isama,” suno kay Mendoza. “As soon as the funds are out, ibaba na kaagad namin yan. Ang hinihintay lang nila, araw, hindi lingo.”#
