Nag-untat na sa byahe ang isa ka jeepney driver sa San Miguel, Iloilo bangud nga magamay nalang ang nagasakay nga pasahero sa iya ginamaneho nga jeep kag bangud man sa mas nagtaas nga presyo sang gatong nga nangin dako nga rason nga wala na halos sila sang ginakita.
Sa interview sang Bombo Radyo kay Garry Sabinod, isa ka operator sang jeep kag temporaryo nga nangin driver, iya ginpahayag nga wala na sila halos sang madamo nga pasahero, apang nagdugang pa gid ang isa ka problema kaangay sang pagtaas sang presyo sang petrolyo.
Suno sa iya, kinahanglan nya gid nga magsakprisyo kag mangin temporary driver agud nga padayun ang pagbyahe sang iya nga jeep.
Ginpakigbahin man niya nga mabudlay man kun pagataasan ang pamasahe sang pampubliko nga mga salakyan bangud wala man sang pagtaas sa sweldo sang ila nga mga pasahero, samtang padayun naman nga nagataas ang mga presyo sang mga balaklon.
