Nagapanawagan ang isa ka estudyante nga hatagan man sila sang konsiderasyon agud makabaligya sa Iloilo Terminal Market.
Sa interview sang Bombo Radyo kay alyas Mae, iya ginpahayag nga ang iya benta sa pagbaligya sang mga utan amo man ang iya nga ginasupot agud ibayad sa ila nga tuition sang iya manghod.
Suno sa iya, nagatapos ang iya klase alas-otso sa gab-i kag pagkatapos deritso ini sa merkado kag magbaligya tubtob alas-tres sa kaagahon bangud may klase pa ini alas-syete sa aga.
Pahayag man niya, mismo ang iya amay ang nagatanum sang iya ginabaligya kag ginadul-ong lang ini sa iya bangud wala na ini nagapuli sa ila balay sa Leon para makakinot sa pamasahe.
Paagi sa pagbaligya bilang naga-bolante, daku gid nga bulig ini sa ila pag-eskwela kag pagpangabuhi.
Ini ang rason nga iya gid ginahingyo sa City Government nga hatagan sila sang pwesto kag oras nga makabaligya.
Dugang pa ni Mae, ginasigurado man sini nga sarado na ang merkado bag-o ini magpwesto sang iya nga baligya.
Text by: Bombo Krylle Melliza
