Dismayado ang isa ka indibidwal, matapos nga wala sila ginpahanugutan nga magbakal sang 10 ka litro nga gasolina sa isa ka gasoline station sa siudad.
Sa interview sang Bombo Radyo kay Rene Bordas, isa ka driver, iya ginpahayag nga mabakal tani sila sang gasolina bangud nga kinahanglan nila para sa ila generator sa rason nga brownout sa ila nga lugar.
Suno kay Bordas, isa sila sa mga suki sang gasolinahan kun sa diin ginkakibot nya nga indi na pwede magbakal kun indi direkta nga igatughong sa isa ka salakyan.
Nahibaluan nga ini amo ang ginapatuman sang mga gasoline station sa bilog nga pungsod bangud sa pahanumdom sang Department of Energy nga mga salakyan lang ang ginapahanugutan nga tughungan sang mga produktong petrolyo agud malikawan ang hoarding kag masiguro nga patas ang pagbakal sang publiko.
