Magapatuman sang istrikto nga energy conservation protocol ang Iloilo City Government lakip na ang work stations, satellite offices kag units agud makabulig kinot sa pag-konsumo sang kuryente.
Ini matapos ginpirmahan na ni Iloilo City Mayor Raisa Treñas ang Executive Order No. 030 kahapon nga adlaw nahanungod sa ginpapanaog nga Memorandum Circular No. 114 halin sa Office of the President.
Ini nga Executive Order may tinutuyo nga ipatuman sa pungsod ang 4-day workweek arrangement nga para man sa energy conservation bangud sa pagtaas sang presyo sang gatong sa nagapadayon nga tensyon sang tunga sang US kag Israel batok sa Iran.
Sa interview sang Bombo Radyo kay Joy Fantilaga-Gorzal, Spokesperson ni Mayor Treñas, iya ginpahayag nga bisan nagapatuman sang mga tikang sa pagtipid ang City Government, indi nila pagpahanugutan nga ma-hamper ang paghatag sang serbisyo sa mga pumuluyo.
Suno pa sa iya nga ipabilin sa gihapon sang City Government ang air conditioning units nga naka-set sa 24 degrees Celsius ang thermostat settings agud makabulig sa pagtipid sang kuryente.
Ginpahayag man ni Gorzal nga ang operating hours sang air conditioning units sa mga opisina sang syudad magaandar lamang halin alas 7:30 sang aga tubtob alas 4 sang hapon, halin Lunes tubtob Huwebes.
Ang ini nga tikang kabahin sang mga ginapatuman nga pamaagi sang City Government agud makonserbar ang enerhiya samtang ginapabilin ang serbisyo sa publiko.
Ginpahayag man sini nga maga-adopt man ang syudad sang flip management sa paggamit sang government vehicles agud mas mapahapos ang pagtipid sang gatong.
Dugang pa ni Gorzal nga may ara na sang internal memorandum nga igapatuman sang Administrative Office sa tanan nga mga departamento sang City Government agud masiguro nga masunod ang ini nga mga tikang.
