Atubangon sang Filipina tennis star nga si Alex Eala ang world no. 14 kag Czech player nga si Linda Noskova sa 4th round sang 2026 Indian Wells Open.
Naka-schedule ang hampang bwas sa main court sang Indian Wells alas otso sa gab-i oras sa California, USA, ukon posible 11:00 – 12:00 sa udto (Philippine time).
Nakakit-anay na anay sanday Eala kag Noskova sa 2020 French Open Juniors quarterfinals kun sa diin nagdaog ang Pinay tennis star.
Nakasulod si Eala sa round of 16 matapos ang walkover 6-2, 2-0 win batok kay world no. 4 Coco Gauff nga nag-untat sa paghampang sa round of 32 bangud sa injury sa iya nga kamot.
Sa Instagram story sang 21-anyos nga American player, ginpaathag sini nga indi niya gusto matapos ang hampang sa amo nga paagi.
Gintinguhaan sini nga makahampang bisan sa pagsakit sa iya wala nga butkon, apang samtang nagadugay, nagalala rason nga ginpakamaayo sang reigning French Open champion nga mag-untat na lang.
Ini pa lamang ang ikaduha nga tion sa karera ni Gauff nga nag-untat ini sa paghampang bangud sa injury.
Nagpadala man sang mensahe sang “good luck” si Gauff kay Eala nga nakasumpong man sini sang nagligad nga bulan sa Dubai Open.#
