Nagsaka ang presyo sang pila ka mga produkto nga pagkaon bangod sang bag-o nga pagsaka sang presyo sang produktong petrolyo.
Lakip sa mga nagtaas nga balaklon amo ang tamodios, baboy kag pila ka mga utanon, samtang ginapaabot man nga maapektuhan ang presyo sang bugas.
Suno kay Arnel de Mesa, tagpamaba sang Department of Agriculture, iya ginpahayag nga nagtaas sang P30 ang presyo sang liempo bangod sang mas mataas nga gasto sa pag-transport sang mga produkto.
Dugang pa niya, kun magasaka ang presyo sang mga imported feeds nga ginakaon sang mga baboy, nagadugang man ini sa gasto sa produksyon kun sa diin nagaresulta sa pagsaka sang presyo sang karne.
Nagpaandam ang Department of Agriculture nga posible man nga magsaka ang presyo sang bugas kun magpadayon ang krisis sa presyo sang gatong.
Agud mabuligan ang mga apektado, magahatag ang gobyerno sang fuel subsidy sa mga kwalipikado nga mga mangunguma kag mangingisda sa sulod sang masunod nga duha ka semana.
Nahibaluan nga may yara sang gin-alokar nga P10 bilyon nga pondo nagikan sa Presidential Assistance to Farmers, Fisherfolk, and Families nga ginalantaw nga magamit agud mabuligan ang mga apektado sang pagsaka sang presyo sang produktong-petrolyo.
