Gindeklarar ni President Ferdinand Marcos Jr. ang Marso 20, 2026 (Byernes) nga isa ka regular holiday sa bilog nga Pilipinas bilang pag-obserbar sa Eid’l Fitr.
Suno kay Palace Press Officer Claire Castro, ginhimo ang announcement samtang nga gina-updan ni Marcos ang mga myembro kag mga lider sang Muslim community sa Grand Iftar sa Malacañang.
Sa amo nga aktibidad, ginpabakod sang gobyerno ang respeto sini sa mga tradisyon kag mga kontribusyon sang mga Pilipino nga Muslim.
“The declaration recognizes the significance of Eid’l Fitr, which marks the end of the holy month of Ramadan, a period devoted to prayer, reflection, and fasting,” sandig sa post sang Presidential Communications Office (PCO).
Nahibaluan nga ginaselebrar sang mga Muslim sa bilog nga kalibutan ang Eid’l Fitr sa sulod sang tatlo ka adlaw matapos ang Ramadan ukon ang Holy Month nga amo ang ginpain nga bulan para sa spiritual reflection paagi sa pagpangamuyo, pagpuasa, kag paglikaw sa mg sala.
Nagsugod ang Ramadan sang Pebrero 19.
“The Palace extends its greetings to the Muslim community in the Philippines and around the world as they prepare to celebrate Eid’l Fitr with their families and communities,” kabahin pa sang mensahe sang Malacañang paagi sa PCO.#
(PNA Photo)
