Gin-appoint ni President Ferdinand Marcos Jr. si Tourism Secretary Christina Garcia Frasco bilang Presidential Adviser for Sustainable and Resilient Communities.
Bangud sini, suno kay Palace Press Officer Claire Castro, temporaryo anay nga magapamuno sa Department of Tourism si Undersecretary Verna Buensuceso bilang officer in charge.
Suno kay Castro, ang katungdanan nga ginhatag kay Frasco nagatuyo sa pagpabakod sang implementasyon kag pagsustiner ang priority national initiatives sa lebel sang mga komunidad.
“As many areas across the country face increasing climate-related hazards and disruptions that affect local economies and livelihoods, the President has tasked Secretary Frasco to take on this role to help strengthen the implementation and sustained follow-through of priority national initiatives at the community level,” suno sa Palace official.
“The President expressed his appreciation for her service at the Department of Tourism and conveyed confidence that her experience working closely with local governments and communities will continue to support the Administration’s priorities,” pahayag pa sini.
Nahibaluan nga yara na sa DOT si Buensuceso halin sang 2013 kun sa diin nagpangalagad siya bilang Assistant Secretary, Tourism Attache and Director for East Japan, kag head sang Marketing Development Group.
Ginklaro naman sang Palasyo nga wala nag-resign si Frasco sa DOT kundi ginsaylo lang sa lain nga responsibilidad.
Antes sa DOT, nakaserbe anay si Frasco bilang mayor sang Liloan, Cebu kag spokesperson para kay Vice President Sara Duterte. Anak siya ni former Cebu governor Gwendolyn Garcia nga nagsuporta sa Marcos presidential bid kaupod sa One Cebu party.
Matandaan nga nangin kontrobersyal si Frasco sang nagligad nga mga binulan kag nakalab-ot pa sa Senate deliberations bangud sang mga kritisismo nga nagaalegar ginagamit sini ang government-funded tourism programs para sa alleged “self-promotion.”
Kasunod sang amo nga kontrobersiya, ginmandu sini ang pagkakas sang tanan nga DOT materials nga nagalakip sang iya picture kag nagmandu man siya sa tanan nga regional offices nga mag-untat na sa paghimo sang amo nga content.#
