Justifiable ang ginhatag nga rason sang 34 ka mga kapulisan sang Iloilo City Police Office, matapos ginpangayuan sang paathag kun ngaa wala sila nakapaidalom sa mandatory drug test.
Sa interview sang Bombo Radyo kay PMAJ. Shella Mae Sangrines, spokesperson sang ICPO, iya ginpahayag nga sa inisyal nga evaluation sa ginsumiter nga explanation letter sang nasambit nga mga kapulisan, mayorya sa ila ang nakahatag sang balido nga rason.
Suno kay Sangrines, ginpaidalom na ang mga ini sa drug test kahapon, Marso 12, apang magaguwa pa ang resulta matapos ang pila ka adlaw.
Dugang pa niya nga dapat gid ang mga ini nga magpaidalom sa ginapatuman nga mandatory drug test agud masiguro nga wala sila nagagamit sang ilegal nga droga agud man nga magserbe sila nga ehemplo sa publiko.
