Ginaduso sang pila ka mga traditional jeepney driver-operator sa syudad sang Iloilo ang dos pesos nga saka sa plete subong nga nagatimbuok ang presyo sang gatong.
Sa interview sang Bombo Radyo kay Robert Ventura, iya ginpahayag nga kun mapasakaan ang P13 nga regular fare subong sa tradisyonal nga jeep, masarangan pa ini sang commuters.
Kun indi man pag-aprubahan sang gobyerno suno kay Ventura, magasunod man sila sa protocol, ilabi na nga ginapanumdom man nila ang epekto sini sa mga pasahero.
Nagahingyo ini nga kuntani pamatian man sang gobyerno ang panawagan nga dulaon na ang Oil Deregulation Law kag i-suspend ang excise tax sa produktong petrolyo agud nga makabenepisyo ang kadam-an subong nga may krisis.
Una na nga nagpahayag si Department of Transportation (DOTr) Secretary Giovanni Lopez nga ginatun-an na subong sang Land Transportation Franchising and Regulatory Board (LTFRB) ang pending petition para sa fare hike, apang wala pa ginpatpat ang detalye kun pila eksakto ang isaka sa plete.
