Nagpanawagan ang City Government sa mga kwalipikado nga drivers nga magsumiter na sang ila requirements agud makabaton sang fuel subsidy nga ginahanda sang syudad.
Sa interview sang Bombo Radyo kay Joy Fantilaga-Gorzal, Spokesperson ni Mayor Raisa Treñas, iya ginpahayag nga gin-set sang alkalde ang Marso 23 bilang deadline sang pagsumiter sang mga kinahanglanon agud ma-process kag ma-release gilayon ang fuel subsidy coupons para sa mga drivers.
Suno kay Gorzal, kinahanglan nga ang mga aplikante naga-operate gid sa ila ruta diri sa Iloilo City kag lehitimo nga residente sang syudad.
Lakip sa mga kinahanglanon amo ang balido nga driver’s license kag certificate of public convenience ukon franchise.
Para naman sa mga tricycle drivers, kinahanglan nga ang ila franchise naghalin sa Sangguniang Panlungsod.
Samtang sa mga public utility jeepneys (PUJ), dapat nakalista kag validated sa masterlist sang LTFRB.
Ang tanan nga requirements mahimo isumiter sa Operations Section sang City Traffic Transportation Office (CTTO) nga nahamtang sa Fort San Pedro sa City Proper .
Sa sini nga programa, makabaton sang ₱1,500 nga petroleum products subsidy ang mga jeepney drivers, samtang ₱500 naman ang ihatag sa mga tricycle drivers.
Suno sa city government, ginpatuman ini nga tikang bangud sa padayon nga pagsaka sang presyo sang gatong, ilabi na nga ginapaabot nga magapadayon pa ini sa masunod nga semana.
Dugang pa sang mga opisyal, dako ini nga bulig agud mapamag-an ang galastuhon sang mga drivers nga nagasalig sa adlaw-adlaw nga pagbiyahe para sa ila pangabuhian.
