Ginrekomendar sang Joint Committee sang Sangguniang Panlalawigan ng Iloilo nga paayuhon ang emergency preparedness kag pagpabaskog sang security measures sa Iloilo International Airport kasunod sang shooting incident nga natabo sang Enero 28, 2026.
Sa Joint Committee Report No. 2026-001, ginpahayag ni Vice Governor Nathalie Ann Debuque, head sang Committee on Transportation, Communication and Public Utilities kaupod kay 2nd District BM June Mondejar head sang Committee on Public Order and Security nga lakip sa mga rekomendasyon ang pagpaayo sang Airport Security Program paagi sa mas hugot nga koordinasyon sang mga ahensya kaangay sang Civil Aviation Authority of the Philippines (CAAP), Office for Transportation Security (OTS), kag Philippine National Police Aviation Security Group.
Ginpanawagan man sang komite ang Department of Transportation nga i-prioritize ang expansion kag modernization sang Iloilo International Airport, lakip ang pagpalapad sang passenger terminal, pag-upgrade sang infrastructure para sa modern screening technology, kag pagpaayo sang passenger processing facilities.
Ginpangabay man ang Civil Aviation Authority of the Philippines nga magsumiter sang updated airport security plan sa Sangguniang Panlalawigan sa sulod sang anum ka bulan.
Nahibaluan nga sa hearing sang Pebrero 5, ginreview sang komite ang airport security structure sang Iloilo International Airport nga naga-operate sa idalom sang National Civil Aviation Security Program (NCASP) nga naka-align sa standards sang International Civil Aviation Organization.
Sa pag-review sang komite, ginpahayag nga nagsunod sa protocol ang OTS screening personnel, apang may pila ka vulnerabilities sa layout kag procedures sang screening area.
Suno sa komite, adequate pero “just barely” ang final security screening checkpoint sang airport, gani kinahanglan ini sang pag-upgrade agud mapabaskog ang aviation security kag mapanumbalik ang kumpiyansa sang publiko sa seguridad sa sulod sang Iloilo International Airport.
