Ginapreparahan na sang mga awtoridad ang igapasaka nga kaso nga Reckless imprudence resulting to homicide, batok sa driver sang isa ka salakyan nga nakabunggo sa motorsiklo sang isa ka 20-anyos nga motorista, kagab-ihun sang Marso 15.
Ginkilala ang biktima kay Vhane Rodulf Idao, residente sang Purok 4 Brgy. Damires, New Lucena, Iloilo; Samtang ginkilala naman ang driver sang nakabunggo nga salakyan kay former Calinog Mayor Salvador Divinigracia.
Sa interview sang Bombo Radyo kay Plt. John Rey Laruan, Officer-in-charge sang New Lucena Municipal Police Station, iya ginpahayag nga nagapadulong sa siudad si Divinigracia, samtang nagapauli na man halin sa siudad si Idao sang nagsumalangay ang duha.
Suno kay Laruan, nagaliko na ang biktima sang gulpi lang ini nga ginsalakay sang salakyan ni Divinigracia kun sa diin nayudyud pa sini ang motorsiklo tubob tatlo pa ka kilometro ang kalayuon.
Nasapwan naman si Idao nga puno sang pilas sa iya lawas bangud man sa mabaskug nga impact sang pagkabunggo sa iya.
Gintuyo pa ini nga dal-on sa ospital, apang ginbawian gid sang kabuhi.
