Ginbawian sang kabuhi ang apat ka indibidwal samtang duha naman ang pilason matapos ang stabbing incident nga natabo pasado las-10 sang gab-i sa bahin sang Zone 5 Brgy. San Isidro, La Paz, Iloilo City sang gintalikdan nga Marso 21.
Sa interview sang Bombo Radyo kay John Rey Himatay, tanod sa amo nga barangay, iya ginpahayag nga posible nag-ugat ang amo nga insidente bangud sa ginaalegar paghusayay sa barangay sang duha ka pamilya nga pamilya Muya kag pamilya Provido, angot sa kuryente.
Dugang pa sini nga tatlo ang ginbawian sang kabuhi sa pamilya Provido nga sanday Johnny Sr., Johnny Jr. kag Joven Provido, samtang isa naman ang napatay sa pamilya Muya nga ginkilala kay Tyron kag duha ka pilason nga sanday Gilbert kag Gilmark nga padayon nga ginabulong sa hospital.
Sa separado naman nga interview sang Bombo Radyo kay Virginia Provido, iloy sang tatlo ka napatay nga katapo sang pamilya Provido, positibo sini nga ginkumpirma nga kwarta nga inugbakal sang shabu ang gintunaan sang pagbun-anay sang katapo sang iya pamilya batok sa pamilya Muya.
Dugang pa sini nga ulihi na sini nahibaluan nga naga-inom-inom ang iya bana kag duha ka anak sa ila nga sala kag ginpahayag nga nagwa ang iya anak nga si Johnny Provido Jr. agud magpadulong sa puluy-an sang pamilya Muya para bawion sini ang kwarta nga inugbakal sang shabu nga nagabalor sang P1,500 bangud wala man mahatag ang item sa iya.
Dugang pa sang natungdan nga ang tuyo ni Johnny Jr. amo ang partner sang utod nga babaye sang mag-ulutod nga Muya bangud ginapahayag nga amo ini ang nagabaligya sang illegal nga droga.
Gin-ako man ni Mrs. Provido nga nagagamit sang illegal nga droga ang anak sini nga si Johnny Jr. kag ginasaway man niya ini apang wala ini nagapati sa iya.
