Ginkumpirma ni Punong Barangay Felicitas Hortillosa sang Barangay San Isidro, La Paz, nga madamo sang makaduluda nga mga tawo nga nagapadulong sa ila barangay kun kaagahun nga possible gid nga may mga transakyon nahanungod sa iligal nga mga droga.
Ini kasunod sang nagluntad nga stabbing incident sang nagligad nga Marso 21, 22026, nga gintunaan sang kamatayon sang apat ka mga indibdiwal matapos nga nag-inaway nahanungod sa illegal drugs.
Sa interview sang Bombo Radyo kay Hortillosa, iya ginpahayag nga naga-monitor gid ang ila barangay kun kaagahun bangud madamo ang nagakadto sa ila lugar kag halos indi man nila residente ang mga ini.
Suno sa iya, ginreport na nila ini sa mga kapulisan kun sa diin may mga nadakpan na nga mga durugista.
Gin-ako man sang Punong Barangay nga daw kaangay nga nangin ‘trend’ na ang transakyon sang droga sa ila nga barangay.
Sa interview naman sang Bombo Radyo kay Benjie Legada, Kagawad sang Barangay San Isidro, La Paz, iya ginpahayag nga anay tokhang surrenderee ang isa sa katapo sang pamilya Muya nga si Tyron Muya nga amo ang isa sa apat ka mga ginbawian sang kabuhi sa nagluntad nga sang Marso 21, 2026.
Suno man sa iya nga isa sa mga napatay man sa insidente nga si Alyas Karding sang pamilya Provido ang kilala nga masami nga nagamaoy kun makainom rason nga nagpangayo naman ang iloy sini nga dakpon nalang ini kag presohon agud nga indi naman makahalit sa iban.
Ginpakigbahin man ni Legada nga sa subong, yara sa gihapon sa ospital ang duha ka mga involved sa stabbing incident nga amo sanday JM kag Glinmark nga untod ni Tyron.
