Nagsaka na sa walo ang kumpirmado nga napatay matapos nagtibusok sa Colombia ang military transport plane nga may sakay nga 125 ka mga tawo.
Ginkumpirma ni Colombian defense minister Pedro Anulfo Sanchez ang amo nga trahedya nga naga-involve sang Lockheed Martin Hercules-C-130 plane.
Sa 125 nga sakay sang aircraft, masobra sa 80 ang na-rescue kag subong ginabulong sa ospital. Missing pa ang iban nga mga pasahero as of press time.
Nahibaluan nga sa kabug-usan nga sakay, 114 ang mga pasahero, kag 11 ang crew.
May nagagwa nga mga report nga mga soldado ang sakay sang amo nga eroplano sang natabo ang trahedya.
“At this moment we do not know details of the crash,” suno kay Carlos Fernando Silva, ang commander sang Colombia air force, “except that the plane had a problem and went down about two kilometres from the airport.”
Sa post naman ni President Gustavo Petro sa X, nagpahayag ini nga “this horrendous accident … should not have happened”.
Ginbasol man sini ang “bureaucratic problems” nga amo ang nagapugong sa modernisasyon sa equipment sang armed forces kag ila nga mga aircraft.
“I will allow no further delays, the lives of our young people are at stake,” dugang sini sa iya nga post.
Sang nagligad nga bulan, matandaan nga may Bolivian Air Force C-130 Hercules man nga nagaunod sang banknotes ang nagtibusok sa west sang Colombia nga nagpatay sang 20 ka mga tawo.#
