Ginbisitahan sang Pollution Control Team ang sitwasyon sang ginpa-Bombo nga nagasupot nga waste water sa Laurea Subdivision Zone 7 Buhang Jaro, Iloilo City.
Sa interview sang Bombo Radyo kay Engr. Niel Ravena, head sang Iloilo City General Services Office, iya ginpahayag nga matapos ang ila initial findings sa lugar may ara sang patigayunon nga hearing buwas nga adlaw, Marso 25.
Ini agud ma-eksplikar sang tag-iya kun poso negro bala ini kag kun ano ang rason sang nagasupot nga tubig kun sa diin naga-usbong na ang baho kag delikado sa ikaayong lawas sang mga tawo nga naga-istar sa lugar.
Suno pa kay Ravena, dapat may mga tikang nga obrahon agud indi maapektuhan ang iban nga pumuluyo.
Ginpahayag man sini nga sa hearing nga matabo lantawon sang hearing officer kun ano ang violations sang tag-iya kag isa-isahon man sang mga ini ang problema agud matagaan sang solusyon.
Dugang pa sini nga magapirma sang commitment ang ginreklamo kun ano bala ang dapat obrahon kag ipa-notarize ini.
Nahibaluan nga ini nga problema ang halin pa sang 2024 apang padayon sa gihapon nga naga-perwisyo sa mga pumuluyo sa lugar.
Suno pa kay Ravena nga ila pagatagaan sang solusyon ang ini nga problema agud indi na makapanghalit sa ikaayong lawas sang mga apektado.
