Lakip ang 33 ka mga tricycle drivers sa distrito sang Molo ang nakabaton na sang ila nga coupon para sa programa sang city government nga P500 fuel subsidy.
Sa interview sang Bombo Radyo kay Aguinaldo Bulanon, 41-anyos, iya ginpahayag nga isa ini ka dako nga bulig bangud nga makabyahe na ang ginhatag nga P500 fuel subsidy sa duha ka adlaw.
Dugang pa niya, antes pa ang fuel crisis, makadala pa sila pauli sang masobra P800 nga ila kinitaan sa isa ka adlaw, apang subong yara nalang sa P400 ang madala nila sa ila tagsa ka pamilya.
Si Bulanon amo ang isa sa 1,718 ka mga tricycle drivers nga makabaton sang fuel subsidy humalin Marso 25 tubtob Marso 26, 2026 kun sa diin mahimo na nila ini nga ma-claim sa Biernes, Marso 27.
