Gin-ugyunan sang presidente sang Association of Barangay Captains (ABC) sa Lapuz, Iloilo City ang ginapanindugan sang Iloilo City Police Office (ICPO) nga indi makaalarma ang sitwasyon sang iligal nga droga diri sa syudad.
Sa interview sang Bombo Radyo kay Punong Barangay Arnel Asturias nga amo ang nagpatawag sang meeting agud istoryahan ang amo nga isyu, iya ginpahayag nga suportado sang data ang statement ni Police Lieutenant Colonel Lorenez Losaria sang nag-atubang ini sa ila.
Si Losaria amo ang representative nga nagtambong sa meeting, tal-os kay ICPO officer-in-charge Police Colonel Wilbert Parilla.
Sa pagsinapol, tatlo ka bagay ang ginplastar sini nga mahimo gamiton nga rason suno sa iya nga masiling nga alarming na ang droga. Una, dapat nga kinilo-kilo na sang droga ang makumpiskar; ikaduha, kun may mga opisyales ukon dalagku nga personalidad nga involved sa illegal drugs; kag ikatatlo, kun may mga opisyal nga nadakpan mismo sa operasyon.
Pahayag sini, tag-gamay lang ang na-recover sa Iloilo City kag magamay lang nga users indi pareho sa iban nga lugar kun sa diin may mga barangay officials pa nga involved.
Suno naman kay Asturias, sandig sa ginhambal ni Losaria, kun lantawon sang naglinigad nga mga tinuig, may yara pa gani sang mga dalagku nga mga personalidad nga nagakontrol sa Iloilo pag-abot sa iligal nga droga.
Pahayag pa sang punong barangay, nagsiling ang ICPO nga wala na sang ma-identify sa Iloilo subong nga amo ang nagakontrol sa diin man nga areas kun droga ang hambalan.
“Kun tan-awon naton, napanas ni sang tyempo ni [former President] Digong Duterte. Nagpalagyo gani ang iban kay nahadlok, kay pila ka drug personalities sa aton ang napatay. Ang iban nagpalagyo. That’s why ang iya explanation, indi alarming ang iligal nga droga,” suno kay Asturias.
Sang ginpamangkot ini kun may kilala siya nga nagpalagyo, sabat ni Asturias: “Indi ta nalang na paghambal, kay bisan sin-o daw nakabalo man. May ara man ta gani kilala nga sang una nagpalagyo man pero sang nagligad nag-spokesman spokesman man sa babaw nga nakibot man kita.”#
