Sigurado na ang suplay sang produktong petrolyo sa Petron tubtub sa bulan sang Hunyo subong nga tuig.
Ginpahayag ini sang korporasyon sa pagpanguna sang tycoon nga si Ramon Ang matapos nga nakahitso na sang kasugtanan nga magbakal sang 2.48 million barrels sang krudo halin sa Russia.
Suno pa sa oil giant, ang ila tikang nga magkuha sang dugang nga suplay halin sa Russia ang indi kabahin sang “business-as-usual sourcing strategy” sang korporasyon.
Apang dugang sini, bangud sang sitwasyon subong sa Pilipinas kun sa diin napaidalom na ang pungsod sa state of energy emergency kasunod sang gyera sa Middle East, nagtulod ini sa Petron nga magpatigayon sang “extraordinary emergency measure.”
“[This was] in response to unprecedented geopolitical and supply-chain disruptions andonly after exhausting all commercially and operationally viable alternatives,” suno sa statement sang Petron.
Antes sini, naggwa na ang reports nga nakabaton ang Petron sang masobra sa 700,000 barrels sang Russian crude oil sang nagligad pa nga semana. Ginkumpirma man sang Malacañang ang pag-abot sang amo nga suplay.
Ang Petron amo ang naga-uyat sang 30 percent sang market share sa local fuel supply. Amo man ini ang isahanon lang nga oil refiner sa Pilipinas.#
